Ski-Weekend 8.-10. Januar in der Lenzerheide
Trotz Corona isches Müglech gsi ou Hür es Schiwucheend düre z füehre. Bim Härefahre isch dr Bus trotz Schneechötine bime Hoger usem Tritt gheit u 4 bis 5 Manne hei mit Stosse müesse go nochehäufe. U wie bim 4er Bob astosse hei die Manne när müsse luege, dass si bi fahrendem Bus no chöi ufstiege.
Ou Hür het sech dr Fritz wieder um d Organisation vo däm Wucheend kümmeret. Danke viu Mou Fritz!

Biketage 11.-15. August in Chur
Guet 20 Biker u Bikerinne si im Auguscht nach Chur gfahre, für dert uf üsere Jubiläums-Tour (s 10. Johr) 5 Tag mit Bike z verbringe. Logiert hei mir im «Swiss Bike Hotel» ziemlich im Zentrum vo Chur. Vo dert us hei mir üsi Tagestour aube gstartet. Mir hei Bike mit Motor u ohni gha. So isches müglech gsi aus Gruppe mit verschiedene Fahrniveaus ungerwegs z si. Trotzdem hets die einti oder angeri Useforderige gä, z.B. Bike überne umgfauni Tanne z lüpfe . Näbscht üsne sportleche Useforderige hei mir natürliche ou s Gseuige nid vernachlässiget. Mir heis grad zum Churer Stadtfescht breicht u so hei mir üs nacheme interessante Biketag am Obe aube ou unger d Mängi gmischt. Am letschte Tag (Mändi 15. August) hei mir üse Biketag in Chur nid chönne aträte wius Wätter sehr zwifuhaft gsi isch. So sie mir de früecher Hei gfahre. U da s Wetter im Emmental chli besser gsi isch si mir doch no zu üsem Bikeusflug cho. Mir si ufs Hingerarni gradlet, die meischte auerdings mit Motor u hei dert bi relativ chüele Temperaturen no öppis g esse. Wie immer si die Biketage vom Fritz u Hannes super organisiert gsi, danke viu mou!

Männerriegereise 27.-28. August
Öppe 10 Manne si Ändi Auguscht ufbroche u ufe Stockhorn-Seilbahn-Parkplatz gfahre. Dert si mir uf Chrindi ueche transportiert worde u hei dert bi guete Verhältnis üsi Wanderig zur Alp Obriste Morgeten i Agriff gno (ca. 4.5 Stung reini Wanderzyt). Dr erscht Zwüschehaut für öppis z Trinke hei mir uf der Oberstockenalp gmacht. Übrigens cha me dert ime durchsichtige Iglu übernachte u bi schönem Wätter d Sterne bewundere. Nach witere Wanderstunge si mir bim Bärgbeizli Obriste Morgeten acho. Scho ziemlech abgläge. Für zu üsem Essenstisch hei mir düre Geissestau müsse loufe u chli müesse luege das mir nid grad i Dreck stöh. Ar Mängi Esse hets nid gfäut u so si mir nachem z Nacht mit voue Büch u im Dunkle öppe e haube Kilometer ar Site no zu üsem Gliger glüfe. Zum Glück hei mir Taschelampe derbi gha u so hei mir üs zrecht gfunge u ou die steili Stäge zum Masselager chönne meischtere. Nachere chüele Nacht si mir am angere Tag ufgstange, hei z Morge gno u sie via Ochse zur ungere Gantrischhütte glüfe. Dert hei mir när s Poschtouto gno zum Bahnhof u si mit der Bahn u viune Idrück wieder Hei cho. Danke viu mou Hausi für die abwechsligsriche u abentürleche Wandertäg!


Schlusswort
Das Johr isch füre Fritz u mi e rächti Useforderig gsi, was d Gsundheit abelangt. Mir si dankbar, das mir das guet überstange hei u üs, viellech ou chli mitere andere Sicht ufs Läbe, wieder sportlech chöi betätige. Danke ou üsne Turnkollege für die moralischi Ungerstützig u s Mitträge! I wünsche aune Manne wo schüsch afe chli Bräschteli oder e gsundheitleche Igriff vor sech hei guets Glinge. U mir fröie üs we mir zäme ou nöchscht Johr wieder gsung u munter dörfe turne u s einte oder s angere chöi ungernäh.