Ski-Weekend 7.-9. Januar in der Lenzerheide
Wie scho letscht Johr hei mir ou Hür d Schi unger d Arme gno u hei mitenang ir Lenzerheide es paar Schitäg gnosse. S Wetter isch nid immer top gsi, aber mir hei dr Wäg abe immer öppe wieder gfunge. I dr jugendlech gstautete Revier Mountain Lodge si mir guet verpflegt worde. Übrigens chame d Lenzerheide ou im Summer empfähle für z Bike . Wie immer het sech dr Fritz um d Organisation vo däm Schiwucheend kümmeret.
Danke Fritz!
Biketage 11.-13. August
Mit knapp 20 Biker u Bikerinne si mir mitem Büsli i Richtig Seeland/Jura gfahre mitem Ziu Mathod (am ungere Ändi vom Neuenburgersee). Hür hei s erscht Mou aui s e-Bike derbi gha, was eifacher gsi isch für ungerwägs zäme z blibe u so die verschiedene Fahrniveaus chönne z kompensiere. Dr Bus hei mir bim langjährige Wi-Lieferant (Fam. Gass) chönne parkiere. Am erschte Tag hei mir e Tour oberhalb vom Neuenburgersee gmacht uaschliessend hei mir bir Familie Gass e Wi-Degustation dörfe gniesse. Übernachtet hei mir när z Orbe, es paar Kilometer südlech. Am nöchschte Tag si mir mit Ziu Lac de Joux gstartet. E Gägend wo i no nid so kennt ha, ziemlech i de Höger inne, dür schöni Täler bis mir de schlussendlech bim Hotel uf dr obere Seesite acho si. Mir hei die zwe Täg wo mir ungerwägs gsi sie aues im Rucksack mit gno, auso ou s Ladegrät für e-Bike Akku. Mir hei i däm Hotel wieder fein z Nacht gässe u hei üs gnue Zyt für d’Erholig gno. Nachem z Morge si mir miteme voue Akku ume See ume u när uf dr ungere Seesite wieder i Richtig Oschte gfahre. Zersch si mir obsi u när a längeri Strecki ufem Hoger obe gfahre. Verschiedeni Hinderniss si z’überwinde gsi, mit het d Wahl gha dr Zun uf z tue oder über d Rampi näbedranne z fahre. Ungerwägs si mir no are junge Turnverein-Frouegruppe begägnet wo üs no es Jodel-Ständli gäh het. Danke Fritz u Hannes für s Organisiere vo dene Biketäg!
Männerriegereise 26.-27. August
Dr Hans het üs Hür uf Männerriegereis nach Hallau mit gno. Gstartet hei mir miteme Bsuech ufeme Wi-Guet.
Näbscht Degustiere hei mir vom gsprächige Gastgäber no interessanti Gschichte über die Wi-Gägend erfahre.
Übernachtet hei mir z Schaffhausen u am nöchschte Tag hei mir am Wahrzeiche vo Schaffhausen, ar imposante
Festig Munot, e Bsuech abgstattet. Abgrunded hei mir die liecht verrägneti Reis mitere gfüehrte Bootsfahrt rund
ume Rheinfall mit Hörgrät wo mir glichzitig meh vo dr Umgäbig vom Rheinfall u zur Gschicht vernoh hei.
Danke Hans für d Organisation!
Schlusswort
D Männerriegeler ungernäh öppe no zäme öppis, zum Bispiu hei es paar agfange mit Langlouf u hei s Obergoms im März bsuecht um sech sportlech u kulinarisch z betätige. Zum Turnbetrieb ghöre Bike, Walke, Ufwärm u Chraftüebige. U meischtens blibt no gnue Zyt zum Spiele (Schutte, Unihockey, Faustball, etc.). U de hets no zwe wo Wintermeischterschaft Volley spiele. Leider het sech dr René chürzlech bim Turne mit dr Männerriege bim Unihockey zwe Finger broche u faut sowou im Turne u ou im Volley us. I wünsche a dere Steu am René gueti Besserig. Für s nöchschte Turnerjohr wünsche i üs aune e gueti Fitness, Gsundheit u viu Läbesfröid .
Dürrenroth, 5. Dezember 2023, Armin Heiniger